Davao City – Gikalipay sa Clean Air Philippines Movement nga daghan sa dakbayan sa nasud ang nalakip sa listahan nga dunay pinakalimpyo nga hangin sa mga siyudad sa Southeast Asia subay sa resulta sa survey nga gipagula sa usa ka organisasyon di pa lamang dugay.
Matud ni Dr.Michael Aragon, Chairman sa Clean Air Philippines Movement, nagpakita lamang kini nga daghan pa gihapon sa mga lokal nga kagamhanan sa nasud ang nagpromotar sa limpyo nga hangin luyo sa presyur sa dagkung mga kumpanya ug korporasyon nga nagtaud og mga planta ug mga pabrika nga nagbuga og carbon dioxide nga nidaut sa atong mahanggab nga hangin ingon man sa kalimpyo sa atong kawanangan.
Dugang ni Aragon, usaka welcome development alang kanila nga sa 15 ka siyudad sa Asya, ang pinakadaghang nakalinyada mao ang mga dakbayan sa nasud human miabot og onse ka buok ang adunay good ratings diin ika-unom sa puwesto ang siyudad ug ika-48 sa 73 ka nasud sa tibuok kalibutan.
Ang paglakip sa Davao City isip sa adunay pinakalimpyo nga hangin nagkumpirmar lamang sa pasidungog nga isip kampyon sa Clean Air Act uban sa dakbayan sa Iloilo nga gitahag sa naasoy nga organisasyon niadtong 2017, matud ni Aragon.
Gipasabot ni Aragon nga ang itum nga aso nga ginabuga sa pabrika, paktoriya, sakyanan ug planta sa kuryente nga migamit og coal ug fuel mahimo kanang carbon dioxide nga gitudlong kawsa sa climate change ug global warming nga nahitabo sa kalibutan karon.
Dugang pa ni Aragon nga ang carbon dioxide nga ginabugwak sa mga sakyanan ug uban pa maoy nagpaguba og maayo sa ozone layer busa ang kainit sa adlaw mudirekta na sulod sa kalibutan diin ang epekto niini mao ang pagtaas sa temperatura sa kadagatan kung manukad ang pagmugna sa super bagyo, linog, paghuwaw sa kayutaan ug padaghan sa mga balatian ug daghan pang uban.
Busa gihagit ni Aragon ang kagamhanan karon nga panahon na aron magkambyo sa sistema sa transportasyon, paghimo og kuryente ug uban pa nga sama sa ubang kanasuran nag-adaptar na og ‘renewable energy sources’ ug elektrisidad nga mga behikulo ug pagbaton og anti-air pollution devices.
Gamitan og puthaw nga kamot sa kagamhanan ang pagpatuman sa mga balaud nga may kalabutan sa kinaiyahan ug kasuhan ug presohon ang mga empleyado ug mga opisyal sa DENR ug sa mga lokal nga gobyerno nga nalambigit sa suborno ug korapsyon.
Sa tan-aw pa ni Aragon nga dili pa ulahi ang tanan aron musunod ang Pilipinas sa ehemplo sa ubang kanasuran diha sa pag-adaptar sa renewable fuel sources aron mapildi ang climate change ug mubalik sa normal ug mamahimong himsog ang kinaiyahan isip pagtagana alang sa sunod pa nga mga henerasyon sa mga Pilipino.
RadyoMaN Joel Viray
