General Santos City–Nagpatabang sa Police Station 4 ang usa ka Cherry Villanueva 39 anyos, Sales Clerk ug nanimuyo sa Barangay Calumpang ning syudad human nga gitulis matud pa kini sa duha ka wala mailhing suspect nga sakay ug motorsiklo nga XRM alas 4:00 ang takna sa hapon sa Labus, National Highway atubangan sa F2 Logistic nga establesyemento.
Sumala pa sa biktima nga nagalakaw siya sa maong lugar gikan sa Metro Bank padulong sa Miso Hardware nga nahimutang sa National Highway aron nga mag remit ug kwarta nga 36,500 ka pesos isip pasweldo sa iyahang mga kaubanan sa trabaho.
Pag pag-abot sa may F2 logistic tapad lang sa usa ka gasolinahan adunay mihunong nga 2 ka lalaki nga nakasakay ug XRM nga motor kolor pula .
Gitawag pa siya sa duha ka mga suspek ug dihang wala siya milingi, siya giduolan dayon gitiunan ug armas dungan sa pag deklara ug hold-up.
Pugsanong gikuha sa mga suspek ang bag sa biktima nga may sulod nga kwarta dayon sibat.
Gilayong nagpatabang sa kapulisan ang biktima diin girespondihan ang lugar apan wala na gyud makit-an pa ang mga suspetsado. Sa karon nagpadayon pa ang gihimong imbistigasyon sa kapulisan kalabutan sa maong insidenti. (Dave Silagan)
