Davao City – Gumikan sa labing ulahing terror attack nga nasinatian sa Zamboanga City, ang liderato ning maong dakbayan subling nanawagan ngadto sa katawhan nga hiusahon ang kusog aron mapanalipdan ang tanan.
Sa pakighinabi kaniya sa morning primetime radio social commentary program ‘Straight to the Point,’ gipaambit ni Zamboanga City Mayor Maria Isabelle Climaco nga mas gihugtan pa nila ang pakig-koordinar sa tanang sektor sa komunidad ilabi na ang hut-ong sa mga Kristiyano ug Muslim kinsa iladong nagpuyo nga malinawon isip managsoon o managhigala.
Matud sa alkalde, gikalipay nila ug daku uyamot ang pahasubo, moral support ingon man tabang sa uban pang mga kalungsuran sa Mindanao sama sa Davao City nga maoy hometown ni Pres. Rodrigo Duterte gumikan sa pakig-alayon ngadto sa mga Zamboangueños niining panahon sa hagit ug tumang pagbangutan.
Kahinumdoman nga ang maong syudad nahimong target kini sa mga terror attacks sama sa Zamboanga Siege niadtong 2013 ug ang labing ulahi sa kutay sa mga hulga mao ang Islamic Mosque bombing niadtong niligad nga mga adlaw nga gikamatay sa pipila ug gika-angol sa lain pang uban.
RadyoMaN June Duterte
