Davao City – Hugot nga gibantayan karon sa Philippine Coast Guard ang kadagatan sa Davao Region human midagsa ang mga bloke sa cocaine nga nagkantidad sa 250 milyones ka pesos sa baybayon sa Barangay Santiago, Caraga, Davao Oriental.
Sumala ni Coast Guard District Southeastern Mindanao Commander Commodore Roy Echeverria atol sa interbyu sa RMN Davao nga iyahang gimanduan ang tanang station commanders nga pahugtan ang pagpatrolya ug pagmonitor sa ilahang mga areas aron walay makalusot nga mga kontrabando o mga iligal nga droga.
Gibutyag ni Echeverria nga sa kasamtangan wala silay namonitor nga mga suspisyusong mga langyaw nga mga barko o vessels dinhi sa Davao Region.
Giawhag ni Echeverria sa mga namuyo sa mga coastal areas nga i-report sa mga awtoridad kung aduna may mga kadudahang mga butang nga mulutaw diha sa mga dagat.
Nagpadayon usab ang ilang koordinasyon sa PDEA XI ug sa kapulisan diha sa imbestigasyon aron masuta kung kinsa ang mga suspek nga nanagiya sa maong mga droga.
RadyoMaN Aimee Guinita
