TACLOBAN CITY – Gin-oobligar na han Philippine Coast Guard an tanan nga nagtatag-iya hin sakayan-pandagat nga ig-rehistro an ira mga sakayan tungod nga magtitikang na hira ha istrikto nga panakop ha tanan nga klase hin sakayan nga diri pa rehistrado ha ira.
Nagtikang an panrehistro han Philippine Coast Guard ha mga sakayan dida pa han syahan nga semana han Nobyembre 2017 ngan tinikangan yana nga Pebrero in ipapatuman na han buhatan an ira panakop.
Sumala kan Lt. Johonsan Fabilane, Acting Station Commander han Coast Guard station Eastern Leyte, usa ha rason kun kay ano ira ini ginpapatuman in agud mas makaghatag pa hin kadugangan nga maritime security.
Dugang pa han opisyal, waray ini bayad ngan padayon an ira pag-akseptar han mga magpaparehistro .
Kun pananglitan naman nga may makita ngan madakop an Phil. Coast Guard nga diri rehistrado nga sakayan in ira ini dayon kokompiskahon.
Kun magpaparehistro, kinahanglan la magdara hin Certificate of Residency ngan Certificate tikang ha Brgy. nga hira gud an tag-iya han sakayan, 2×2 picture ngan photocopy han bisan ano nga government I.D.
