Para privini el trahedya, strictamente el Philippine Coast Guard (PCG) ta implementa con el prevensyon del “overloading” na mga barko y lancha que ta viaja na mga isla sercano aqui na rehiyon.
Enantes aga, monton del mga pasajero desdel ciudad de Lamitan para aqui na ciudad de Zamboanga el ya man stranded y nuay fuede munta na primer viajes del barko, porcausa cay sobra ya el numero diila cumparando na capasidad del tal transportasyon.
Solamente hasta na eksacto numero lang del capacidad de pasajero y carga el ta manda munta el Coast Guard para privini el traheyda na la mar que bajo na diila jurisdiccion.
Masquin manada pasajero el ya pricura pa era munta na barko, nuay mas canila manda entra na pantalan para hinde mas man-overload el barko. Aviso del PCG con el mga pasajero, sigui con el reglamento de viaje para evita el desgrasya. – *Bhong Simbajon/RMN News*
