Mangu ang Criminal Investigation and Detection Group-7 sa pagdakop sa Subuanong negosyante nga si Peter Lim , human imando sa korte sa kaulohan nga kini dakpon .
Gibutyag kini sa tigpamaba sa Police Regional Office-7, Supt. Reyman Tolentin.
Subay kini sa mando sa Makati Regional Trial Court nga dakpon sila si Lim ug ang giinging drug lord sa Eastern Visayas nga si Kerwin Espiniosa ug laing kaubanan , may labot sa kaso sa negosyo sa ilegal nga drugas.
Apan giklaro sa hepe sa CIDG-7, Sr. Supt. Lito Patay nga karon wa pa sila mangita ni Lim kay wa pa sila`y kopya sa warrant of arrest.
Dugang ni Patay, nga wa pa usab sila makadawat ug kamanduan gikan sa ilang ulohang buhatan.
Nagtoo hinoon ang kapolisan nga nia ra sa Sugbu ang negosyante nga si Lim.
