Davao City – Matag entrada sa bulan sa Enero, sagad mabati ang grabe kabugnaw sa panahon hilabi na inig gabii ug kadlawon busa bisan pa og magbukot og habol mabugnawan sa gihapon ang tibuok lawas.
Ang kabugnaw sa panahon karon sa nasud resulta kini sa ‘polar vortex’ kun pagbaga sa ice nga nasinati sa Estados Unidos diin ang temperatura sa Amerika mihagsa na karon og 13 degrees Fahrenheit.
Apan matud sa kanhi Comval Provincial Health Officer ug karon ComVal Province Board Member Renato Basañes nga walay angay ikabalaka ang publiko sa panahon karon kay wala magdala og virus ang kabugnaw karon.
Sumala ni Basañes kinsa usa ka doctor by profession nga walay virus kun bacteria mabuhi sa bugnaw kay og masakit pa ang tawo tungod sa bugnaw wala na unta’y mag-aircon samtang matulog.
Matakbuyan lang og sakit ang tawo kun infected kini sa virus ug bacteria nga puwede makuha gikan sa paghanggab sa hangin sa palibot.
Gidugang pa sa board member nga wala gikinahanglan ang igong kahibalo aron makalikay sa kabugnaw sa panahon sanglit naandan naman kini sa tanan matag unang buwan sa tuig.
Rekumendasyon ni Basañes mao nga muadto dayon sa doktor kung may kalentura kay basin sintomas kini sa bacteria sa dengue ug pneumonia nga kun dili dayon tambalan basin mao madisgrasya pa hinoon ang kinabuhi.
RadyoMaN Joel Viray
