Angayan matud pang bantayan ang mga collateral damage nga imugna dinhi sa Pilipinas kung mugrabe ang tensyon tali sa United States of Amercia ug Iran.
Sa interview sa RMN Malaybalay ngadto kang Political Analyst Professor Ramon Casiple gibutyag niini nga posibleng adunay mahitabo nga collateral damage dinhi sa Pilipinas sa migrabeng away sa duha ka mga nasud.
Kinahanglan matud pang tun-an pag-ayo sa gobyerno ang himoon ug ipatuman nga estratehiya aron sa pag-handle niini.
Una, gitumbok ni Casiple nga usa sa mga collateral damage mao ang mga Pinoy nga anaa sa Iran. Bisan pa man gibutyag niya nga limitado ug gamay lamang ang mga OFW sa Iran ug Iraq kaniadto pa, apan ang problema kung mukatag ang away sa Middle East adunay daghang Filipino sama sa nasud Kuwait, Saudi Arabia, UEA, Qatar ug Dubai.
Ikaduha, ang hisgutanan sa oil price. Matud ni Casiple nga sobra sa 50% sa oil product sa Pilipinas gikan sa Middle East.
Gipasabot niya nga dili man diha-diha ang epekto apan matagamtaman kini pila ka adlaw, semana o bulan.
Lauman na matud pang musaka ang presyo sa oil products kung mupadayon ang mao nga tensyon.
Ikatulo, posible matud pang mahitabo ang gitawag nga international terrorism nga mamahimong madamay ang Pilipinas.
Ika-upat, ang kuwestiyon sa diplomatic relations tungod kay susamang higala sa Pilipinas ang US ug Iran. Gipasabot ni Casiple nga mamahimong magka-pressure ang gobyerno kung kinsa ang dapigan o kaha mo-distansiya na lang.
Ug ang ikalima ang hisgutanan sa economic growth.
Matud ni Professor Casiple nga angayang bantayan pag-ayo sa gobyerno ang maong mga collateral damage.
