Davao City – Istrikto kaayo ang usa ka internetan sa dalang Bonifacio sa ilang mga polisiya tungod kay pag-abot sa 4:00 sa hapon ginapagawas na ang mga minor kay taman ra sila sa unsay gitugot nga oras.
Suma ni Mary Joy Aredidon, internet attendant, una nila tugutan nga maka-renta sa ilang computer unit ang mga minor-de-edad ila una ginapangutana ang edad kung kini minor pa ba o dili.
Sanglit mao kini ang ilang himoong basehan kung pila lang ka oras pwede mag-stay sa internetan ang ilang customer nga minor.
Segun ni Mary Joy nga 90% sa ilang mga customers pulos mga estudyante nga gilangkuban sa babaye ug mga lalake diin nasayran nga 10% lang ang gahimo og research ug 90% pulos ra ga-abli og social media ug gadula.
Dugang ni Mary Joy nga aduna sila’y mga customer nga mahilig sa pornography site ug gani duna pay mga babaye gapangutana kung unsaon pag-access sa pornography.
Giingon sa internet attendant nga hugot gidili sa ilang polisiya ang pag-abli sa mga malaw-ay nga mga sites busa gipa-block sa tag-iya sa internetan ang tanang klase sa pornography.
Migula sa pagtoon nga mas mahilig og dula sa internet ang nag-edad og 18 anyos ug pataas ug sagad sa dili pagsinabtanay ug sa kinantiyawaay sa dula kanang pagkapildi na.
Gibatbat ni Mary joy, ang dula sa internet ug social media nagdala og dili maayo nga impluwensiya sa mga bag-ong tubo karon gumikan adunay ma-develop nga dili maayo nga kinaiya ngadto sa usa ka fanatic og internet.
Mi-apelar si Mary joy sa publiko nga dili lang abusohon ug dili gamiton sa binuang ang internet inay gamiton kini sa maayo nga katuyoan sanglit dako kining tabang sa nagkada-iya nga buluhaton ingon nga tahas sa adlaw-adlaw nga kinabuhi.
RadyoMaN Joel Viray
