Davao City – Posibleng dako ang mamahimong turnout sa mga botante alang sa 2020 Barangay ug Sangguniang Kabataan (SK) Election human nga gidagsa ang unang adlaw sa pagparehistro sa buhatan sa Commission on Elections (COMELEC).
Sa interbyu sa DXDC RMN Davao kang Atty. Krisna Samantha Caballero, spokesperson sa COMELEC-XI, gibutyag niini nga ubay-ubay katawo ang nagparehistro atol sa unang adlaw.
“Kung magpadayon ta’g ingon ani hangtud September 30, mura’g makita gyud nato nga daghan daghan gyud ang turnout sa atong registration,” saysay ni Caballero.
Gikanayon ni Caballero nga wala silay nasinatiang mga dagkong problema atol sa pagparehistro.
Gawas sa pagparehistro, iakomodar usab sa COMELEC ang magpa-transfer, magpa-correction ug kadtong magpa re-activate.
Gikumpirma usab sa COMELEC-XI Spokesperson nga abri ang buhatan sa COMELEC bisan sa holidays labi na atol sa selebrasyon sa 34th Kadayawan Festival.
“Magsugod ta alas-8 sa buntag hangtud alas-5 sa hapon. Kani sya Lunes hangtud Sabado. Then even holidays abierto gihapon ang opisina sa COMELEC,” saysay ni Caballero.
RadyoMaN Kirby Manzon
