Davao City – Gipalanog sa Commission on Election (COMELEC) Davao City nga andam na sila sa umaabot nga Barangay ug Sangguniang Kabataan (SK) Elections karong tuiga.
Sumala ni COMELEC Davao City 3rd District election officer assistant Misah Casar nga anaa na sila karon sa 80% sa pagpangandam alang sa taliabot nga piniliay sa Barangay ug SK karong Mayo 14, 2018.
Giingon ni Casar nga dili automated ang eleksyon sa Barangay ug SK inay mobalik sa manual sanglit ang gamitan lang sa automated system mao ang national election ug dili sa barangay level.
Segun ni Casar, muabot sa 8,000 ka magtutudlo ang magsilbi sa kapin 2,000 ka mga polling precincts sa siyudad sa umaabot nga piniliay karong tuiga.
Ang COMELEC Davao City nag-ila na karon sa electoral board members nga maglangkub sa tulo ka magtutudlo gawas sa DepEd supervisor nga ibutang sa matag tulonghaan panahon sa election.
Dugang ni Casar, gikatakdang ipailawom sa briefing ang 8,000 ka mga magtutudlo sa bulan sa Marso ug sa final briefing sa bulan sa Abril aron ipahinumdom kanila ang general instruction sa piniliay karong Mayo.
Kabahin sa gipreparahan sa COMELEC mao ang paglusad og education campaign sa mga barangay labot sa unsay puwede ug dili angay buhaton sa mga kandidato ug sa mga botante sama sa vote buying.
Gitinguha sa mao nga buhatan nga majority sa mga botante makaboto sa barangay ug SK election subay sa ilang kagustohan ug konsensiya nga dili diniktahan sa mga kandidato.
Makig-alayon ang maong buhatan ngadto sa DCPO, Task Force Davao ug militar aron mahisgutan na daan ang security plan aron luwas ang eleksyon karong Mayo.
Ang mga barangay sa kabukiran sa ikaduha ug ikatulo nga distrito lakip usab sa ilang ginabantayan tungod sa presensiya sa CPP-NPA-NDF,matud ni Casar.
Hangtud karon wala pa’y nadawat ang COMELEC Davao City nga kamanduan gikan sa ilang central office kun i-oktaba ba o dili ang Barangay ug SK elections sa bulan sa Mayo.
Busa dako ang pagtoo ni Casar nga mahinayon gayod ang barangay ug SK elections karong Mayo 14 gawas lang kun magpagula og bag-ong orden ang ilang central office nga dili mahinayon ang pagpili sa bag-ong mga kapitan ug mga kagawad.
RadyoMaN Joel Viray
