Davao City – Aminado ang Commission on Election (COMELEC-XI) nga wala gayod silay mabuhat sa pagkakaron aron gukdon ang mga kandidato sa 2019 midterm election nga sayo nagpasulod og commercial sa televisions ug radio stations nga usa na ka matang sa pagpromotar sa ilang mga kaugalingon bisan og wala pa’y opisyal nga kampanya.
Hinoon, nanganti karon si COMELEC-XI spokesperson Atty.Krisna Caballero nga dili sila magduha-duha sa paglutos sa mga pulitiko nga wala magsubay sa reglamento sa kampanya nga ipagula sa ilang Central Office alang sa opisyal nga pagsugod sa kampanya.
Matud ni Caballero, dili lilong sa ilaha ang ginabuhat sa mga kandidato karon diin ang uban gipaagi sa mga segment sa senemana nga programa sa telebisyon ang istorya sa ilang kinabuhi apan mag-unsa man sila nga wala pa man silay gihuptang bala aron ilang mabadlong ang salawayong mga pulitiko sanglit walay palisiyang gipagawas ang ilang nasudnong buhatan.
Gipaniguro ni Caballero nga walay mga kandidatong makalusot sa hugot nga implimintasyon sa mga palisiya sa kampanya ug ila gayod gukdon ug lutuson ang mapamatud-an nga mulapas sa limitasyon sa political advertisements ug sa gasto sa tibuok period sa campaign ug sa piniliay.
Gidasig usab ni Caballero ang mga botante nga dili magpadala sa estilo sa mga kandidato inay ilhon og maayo ang pagkatawo sa ilang pilion ug mas palawman pa ang pakisayod sa giyagyag nga mga plano ug plataporma sa mga midagan karon aron sa ingon, dili kita magmahay pag-abot sa panahon.
RadyoMaN Joel Viray
