COMELEC: Gun ban tahuron nato

24

Davao City – Gipalanog karon sa Commission on Election Davao Region nga sugod sa Enero 13, 2019 magsugod na ang pagpatuman sa election gun ban dungan sa pagsipa sa election period sa tibuok nasud.

Gitambagan ni Comelec-XI Spokesperson Atty. Krisna Caballero ang publiko nga dili una magdala-dala og armas gawas sa ilang panimay aron dili sikopon bisan og lisensiyado pa ang hinagiban.

Segun ni Caballero,ang adunay katungod magbitbit og armas mao ang kapulisan ug militar apan kadto lamang gi-isyu kanila ug dili kadtong pribadong mga armas.

Apan puwede ra maka-apply og gun ban exemption ang mga politiko ug mga indibidwal aron dili sila dakpon sa kapulisan nga magpahigayon og checkpoints ug chokepoints sa kadalanan.

Gipasabot ni Caballero nga tinguha sa ilang Central Office ang usa ka malinawon nga piniliay ug layo sa kaguliyang karong Enero 13, 2019.

Nanghinaot si Caballero nga dili musangko sa bayolenteng buhat ang mga politiko ug mga kandidato bisan pa og alanganin ang ilang kadaugan niining umaabot nga bugnong lugayno.

Dugang ni Caballero nga kabahin sa ilang paningkamot karon mao ang pagpaabot sa impormasyon ngadto sa mga botante aron mahibaloan nila ang ilang katungod sa pagboto.

Sa samang paagi, malaumon ang tigpamaba nga dili harason ug hulgaon sa mga kandidato ang mga botante sa kung kinsa ang ilang botaran sa adlaw sa paghukom.

Gitino usab ni Caballero nga wala pay konkretong guidelines kontra sa practice gitawag nga premature campaigning sa mga kandidato sanglit wala pa’y ispesipikong palisiya gipagawas ang poll body alang niini nga katoyoan.

Magsugod ang bayolasyon sa premature campaigning inig sugod usab sa kampanya sa national karong Pebrero ug local campaign sa Marso ning tuiga.

RadyoMaN Joel Viray

Facebook Comments