Davao City – Magsugod na ang Commission on Elections (COMELEC) sa pagdawat sa kadtong buot magparehistro sugod karong adlawa, Agosto 1 hangtud sa Setyembre 30, 2019 isip preparasyon alang sa 2020 Barangay ug Sangguniang Kabataan (SK) Election.
Sa interbyu sa DXDC RMN Davao kang Atty. Krisna Samantha Caballero, spokesperson sa COMELEC-XI, gibutyag niini nga abri ang ilang buhatan dili lamang alang sa magparehistro kundili lakip na kadtong sa buot magpa-transfer, magpa-correction ug kadtong magpa re-activate.
“Mudawat gihapon ta og transfer for this registration. Mo-accept gihapon ta even kadtong magpa correction ug kadtong magpa re-activate, kadtong mga botante nato nga na-deactivate na, pwede ta magpa process pud og reactivation,” saysay ni Caballero.
Gibutyag ni Caballero nga kinahanglan lamang magdala og valid ID o government-issued ID o kaha birth certificate atol sa pagparehistro.
Samtang giklaro sa tigpamaba sa COMELEC-XI nga kadtong mga nakaparehistro na sa milabay nga tuig, 2018 nga mi-apil sa barangay election dili na pwede magparehistro pag-usab.
RadyoMaN Kirby Manzon
