Davao City – Giklaro karon sa Commission on Election (COMELEC) nga dili gayud maapil sa ihap ang sobra nga pagboto kun overvoting atol sa 2019 Midterm Election.
Sa pakighinabi sa DXDC RMN Davao kang Atty. Krisna Samantha Caballero, spokesperson sa COMELEC-XI, gipasabot niini nga sama sa pagpili sa mga kanidadato sa pagka senador, 12 lamang ang kinahanglan ug kung mulapas kini sa 13, dili na maapil sa ihap ang tanang boto sa maong posisyon.
“So sa senator dapat 12 lang pud kabuok senators. Kung mag overvote, dili basahon sa machine ang tanan niyang votes gikan sa 1 hangtud sa 13. Pero kadtong ubang iyang giboto sa ubang posisyon, pwede to basahon sa machine.” segun niini.
Hinuon sumala pa ni Caballero nga kung undervoting o sama sa pagpili og ubos sa 12 ka senador, wala kini problema.
Pahinumdom sa tigpamaba sa COMELEC nga angay nga masayud ang usa ka botante kung pila lamang ang angay nga iboto sa matag posisyon aron siguradong maapil sa ihap ug dili masayang ang boto niini atol sa piniliay.
RadyoMaN Kirby Manzon
