Davao City – Gihatagan lamang sa Commission on Election (COMELEC) og 72 oras ang mga kandidato ayha ang campaign period sa pagtanggal sa ilang mga election paraphernalia sama sa posters ug mga tarpaulins nga wala misunod sa guidelines sa buhatan.
Sa pakighinabi sa DXDC RMN Davao kang Atty. Krisna Samantha Caballero, spokesperson sa COMELEC-XI, gibutyag niini nga makonsiderang election offense ang maong kalapasan diin ang makabuhat sa ingon, mag-atubang sa silot nga pagkabilanggo nga dili muobos sa usa ka tuig ug dili musobra sa unom ka tuig.
Subling nagpahinumdom si Caballero nga 2 feet by 3 feet ang standard nga sukod sa posters ang ginatugutan sa COMELEC ug ibutang lamang kini sa designated poster areas.
Kung ibutang man kini sa mga private properties, kinahanglang aduna kini pagtugot sa tag-iya sa lugar.
Ang mulapas usab niini mamahimong mag-atubang sa election offense labot sa fair election act sa COMELEC resolution 10488.
RadyoMaN Kirby Manzon
