Davao City – Duha ka sundalo ang samdan samtang nakabsan sa kinabuhi ang commanding officer sa 16th Infantry Battalion atol sa engkwentro batok sa New People’s Army didto sa Sitio Quimbao, Brgy. Mapula, Paquibato District ning syudad sa Davao bandang alas 4 sa hapon adlawng Huwebes.
Giila ang army officer nga si 1LT Jarren Relota, kinsa napatay atol sa ilang pagresponde sa report nga adunay presensya sa NPA sa maong lugar.
Gipaulanan ug bala ang grupo ni Relota ug gipabuthan og landmine ang ilang gisakyan hinugdan sa kamatayon sa biktima ug pagkaangol sa laing duha pa ka mga sundalo nga sila CPL. Josua de Jesus ug PFC Geraldo Masslang.
Sa interbyu sa DXDC RMN Davao kang Joint Task Force Haribon Commander MGen. Noel Clement nga hayaon si Relota sa St. Peter’s Panacan una pa man siya ihatod ngadto sa iyang pamilya sa San Jose, Antique karong adlawng Dominggo.
“The wake mag-start late this evening kasi right now the body is still undergoing autopsy as requested by the family,” sumala ni Clement.
Luwas na sa delikadong kahimtang ang duha ka mga nasamdang mga sundalo kinsa na-confine karon sa Metro Davao Medical and Research Center.
Nibisita usab sa ospital si Davao City Mayor Sara Duterte-Carpio karong adlawa.
RadyoMaN Aimee Guinita
