Davao City – Nag-atubang karon og reklamo sa kapulisan sa Sasa ang usa ka higante nga commercial airline human nawala ang luggage bag sa usa sa mga pasahero sa eroplano.
Nasayran nga nagsakay sa Philippine Airlines si Maffie Debil nga taga-Boulevard ug matod niini gikan sa kaulohan ug paglanding sa Davao International Airport alas-5:50 sa kahaponon niadtong Pebrero uno nawagtang na ang iyang luggage bag.
Sa unang higayon, pulos namalibad ang mga empleyado sa PAL nga wala sila masayod kung ngano kalit nawani ug si kinsa ang nagtago sa luggage ni Debil busa mipauli kini nga naghambin og dakong dismaya sa tagdumala sa airline.
Human sa nakalabayng duha ka adlaw, usa ka Angelita Manatad ang nanawag ug nagpahibaho kang Debil nga nakita na iyang luggage bag.
Apan nalusno ang kalibutan sa pasahero dihang iyang nakita nga daw gipugos og guba ug giablihan ang luggage bag hinoon wala na gibutyag kung duna ba’y nawala nga mga gamit.
Ang nagpaigting sa duha ka dunggan sa biktima mao ang gisulti sa PAL nga dili nila tuloganon ang guba nga luggage sanglit ang ila lang daw obligasyon mao ang pagpangita ug pagbalik sa bag busa wala niya dawata pagbalik ang luggage.
Tungod kay walay nahimo ang complainant sa iyang reklamo sa tagdumala sa PAL midangop na lamang kini sa kuwerpo sa kapulisan sa Sasa aron ipatala ang mao nga panghitabo.
RadyoMaN Joel Viray
