General Santos City–Aminado si Gensan City Mayor Ronnel Rivera nga aduna gyo’y sipyat sa pagpili sa mga benepisyaryo nga angay unta makadawat sa Social Amelioration Program kon SAP nga ayuda nga gihatag sa gobyerno sa mga na-apektuhan sa krisis sa COVID-19.
Sumala pa sa Mayor nga nahuman na ang committee hearing sa SP kalabutan sa pagpanghatag sa SAP kung asa gipatawag ang mga personahe sa DSWD sa hawanan sa Konseho sa pagpanguna ni City Councilor Atty. Edmar Yumang, aron hisgutan nganong daghan ang nagreklamo nga mga tawo nga wala nakadawat ug ayuda gikan sa SAP nga angay unta mahimong benipisyaryo sa maong programa.
Matud pa sa opisyal nga wala kaayo naka-andam ang lokal nga kagamhanan gumikan kay gipadali matud pa sa national ang pag-release sa SAP rason nga walay mahimo ang Lokal Government kon dili suportahan na lang ang programa sa National Government.
Apan aminado si Mayor Rivera nga tungod sa nahitabo daghan ang ilang nakat-unan nga sa mosunod nga mga sama niining sitwasyon dili na mahitabo pa.
Samtang pagpaklaro usab sa Mayor kalabutan sa gipanghatag nga manok sa syudad nga tag-usa gayud ka kilo ang madawat matag household sa Gensan. Apan adunay mga reklamo gikan sa pipila ka mga residente sa syudad nga dili tibuok inay na-slice na ang ilang nadawat.
Ang maong reklamo nakatakda usab nga sayron ni Gensan City Mayor Ronnel Rivera.(RV)
