Davao City – Wala gilimod sa Police Regional Office 11 (PRO-XI) ang pagkusog sa common crime sa pipila ka lugar dinhi sa siyudad sa Dabaw ning ulahing mga adlaw.
Gani,suma ni PRO-XI Spokesperson Police Chief Inspector Milgrace Driz nga dili na lilong kang Director Manuel Gaerlan ang subling pagsiaw sa mga kawatan, mga tulisan, ug mga isnatser dinhi sa dakbayan.
Gipasabot ni Driz nga natural lang sa matag abli sa klase mugara ang mga kawatan tungod niining pa-nahona daghan silang puwede mabiktimang mga ginikanan ug mga estudyante sa mga tulonghaan.
Ug gumikan ani, nagpakanaog na og kamandoan si Gaerlan ngadto sa mga hepe nga pakusgan ang police visibility sama sa mobile ug foot patrol aron masanta ang paglihok sa mga kawatan.
Samtang gipalapdan ang presensiya sa kapulisan, lakip gimandar ni Gaerlan ngadto sa mga hepe sa mga presinto sa kapulisan ang paglusad og imbestigasyon sa mga nahitabong isnatsing, tulis, ug lungkab aron madakpan ang mga suspetsado.
Luyo sa pagsaka sa common crime sa siyudad, gipalanog pa sa opisyal nga mas ubos ang crime rate sa dakbayan karon ikumpara sa nangligad nga panahon.
Hinoon, gihangyo ni ang publiko nga makig-alayon dayon sa mga otoridad ugali dunay dautang tawo aron maaksyonan dayon kini sa kapulisan.
RadyoMaN Joel Viray
