Polanco, ZDN-Natagamtaman sa mga residente sa Barangay Guinles ang libreng serbisyo sa gobyerno pinaagi sa Community Outreach Program nga dala sa kagamhanang-lokal sa Polanco nga gipangunahan ni Mayor Evan Hope Olvis dili palang dugay.
Kauban ni Mayor Olvis sa nasangpit nga kalihokan ang nagkalain-laing lokal ug nasudnong ahensiya sa kagamhanan sama sa Philippine National Police, Bureau of Fire Protection, Rural Health Unit, Municipal Social Welfare and Development Office, Municipal Civil Registration Office, ug Municipal Agriculture Office ug uban pang mga buhatan sa gobyerno.
Sa nasangpit nga community outreach caravan, kapin kon kulang 180 ka tawo ang nahatagan ug libreng konsultasyon-medikal, duolan sa 100 ka mga bata ang nabakunahan ug anti-dengue ug polio, 55 naibtan ug ngipon, ug daghan usab ang nakapahimulos ug libreng alot.
Gawas sa nagkalain-laing serbisyo, busog ug malipayon usab nga namauli ang mitambong sa caravan, lakip na ang mga kabataan gumikan sa libreng paniudto ug mga regalong gihatag sa Kagamhanang-lokal sa Polanco ngadto kanila.
Sa gipahigayong programa, gipahayag ni Mayor Olvis nga ang Community outreach program mao lamay pagmatuod sa taga-Polanco sa iyang matinud-anon ug kinasing-kasing nga serbisyo subay sa iyang gisaad panahon sa kampanya, hangtud nga milingkod na siya isip amahan sa lungsod.
Tagsa-tagsa gilayong mipabati ang mga representante sa mga buhatan sa mga programang gilugway sa ilang buhatan.
Gipahinumdoman ni Police Inspector Antonio Tapales nga mirepresentar sa hepe sa kapulisan sa Polanco nga si Police Senior Insp. Angelito Derama ang publiko pagsurender sa ilang armas nga expired na ang lisensiya sa ilang buhatan ug dili pagdala-dala ug armas sa gawas sa ilang panimalay ilabi na karon nga ania na kita sa sulod sa election period.
Gipahimangnoan usab ni Insp. Ricardo Acaylar ang publiko nga mag-amping aron malikayan ang sunog, ilabi na karon nga tinginit na. Giawhag naman ni Muncipal Engr. Manuel Leones ang taga Guinles nga moadto sa ilang buhatan sa di pa magtukod ug balay o unsa mang edipisyo aron malikayan ang unsa mang problema.
Ang barangay Guinles mao na ang ika 29 ka barangay sa Polanco nga nakatagamtam sa Community Outreach Program gikan sa kagamhanang-Lokal sa lungsod. Gipasalig ni Mayor Olvis, nga sunod bulan, ang susamang kalihokan ang ipahigayon na usab sa barangay Santo Niño.(Alfonso Roda)
