Community service angay’ng silot sa improper face mask disposal

26

Davao City – Suportado sa Barangay Lasang ang ordinansa nga magdili na unya sa pagpataka og labay sa ginamit na nga face mask nga giduso ni 3rd District Councilor Joselle Villafuerte.

Sumala ni Kapitan Allan Simo-ag nga ilang gipaboran ang Improper Face Mask Disposal Ordinance nga gipasar ni Councilor Villafuerte kinsa Chairman sa Committee on Health sa konseho ning siyudad.

Segun ni Kapitan Simo-ag nga samtang gipanday ang maong ordinansa, ang ilang barangay nagbuhat na karon og education campaign aron ipasabot ang paglabay og sakto sa face mask.

Gimando ni Kapitan Simo-ag ngadto sa iyang mga tigkolekta og basura nga dili dawaton ang basura kon wala kini ma-segregate ug maputos og laing cellophane ug dunay nakasulat nga face mask ang gisudlan.

Gibuhat ang nasangpit nga inisyatibong lakang sa katuyoan nga madisiplina sa paglabay og basura ang mga tawo partikular sa face mask ug nga malikayan ang pagkalat sa COVID-19 sa tibuok barangay.

Ang face mask gama kini gikan sa dense thermoplastics ug usa ka matang sa kemikal nga dili madugta ug magpabilin kini sa kinaiyahan hangtud sa 450 ka tuig kon kapin upat ka siglo.

Ang thermoplastics gama kini gikan sa mga tanaman ug giproseso pinaagi sa kemikal aron mahimo ang face mask diin pipila sa mga kemikal nga gigamit mao ang polyethylene, polypropylene, ug polystyrene.




Ang maong mga kemikal makunsidara nga hazardous kon kuyaw dili lang sa kinaiyahan apan labaw sa tanan sa panglawas sa tawo.

Busa pabor si Kapitan Allan Simo-ag nga silotan ang mga bisan kinsang masakpang magpataka og labay sa ilang mga face mask pinaagi sa giduso karon nga ordinansa sa hawanan sa konseho.

Ang ordinansa nagtakda og silot sa mga Dabawenyong malapason niini diin ang unang offense multahan og 500 pesos o dili ba kaha reprimand ug seminaron samtang usa ka libo alang sa ikaduhang opensa, duha ka libo alang sa ikatulo nga opensa, ug tres mil ka pesos sa sunod-sunod na opensa.

Apan alang kang Simo-ag, ang mas maayong silot mao ang community service sulod sa pila ka oras inay nga multahan og kantidad aron sa ingon makakat-on sa mabuhat nga sayop.

RadyoMaN Joel Viray

Facebook Comments