Composite sketch sa mga suspek sa pagpatay kang newly-elected Kapitan Saquian sa Panabo, Davao del Norte, gipagula na

Davao City- Gipagawas sa Special Task Group (SITG) Saquian ngadto sa publiko ang composite sketch sa mga suspect nga nipusil-patay kang elected kapitan sa Brgy. Datu Abdul, Panabo City Davao del Norte nga si Paul Albert Saquian.

Gipresenta atol sa press conference ang computerized facial composite sketch sa mga suspetsado diin gihulagway ang usa nga anaa sa 30-35 ang edad, 5’3 ngadto sa 5’4 ang gitas-on ug nagsuot og grey nga hoodie jacket, itom nga tube mask ug blue maong short pants nga mao’y gitudlong gunman.

Samtang ang isa gihulagway sa mga otoridad nga anaa gihapon sa 30-35 ang edad, 5’5 ngadto sa 5’6 ang gitas-on, duna’y dark complexion ug nagsuot og itom nga jacket nga duna’y inner t-shirt, nilubad na nga grey cargo pants, aduna’y itom nga helmet nga mao’y driver sa motor nga ilang gisakyan.

Sa eksklusibong interview sa DXDC RMN Davao kang Police Colonel Alexander Serrano, Davao del Norte Police Provincial Office Provincial Director pinaagi kang RadyoMaN Aimee Guinita, aduna’y usa sa mga witness ang nakaaktong nakakita sa riding in tandem suspects nga wala naka-masks.

Apan hangtod karon, dili pa maestablisar sa SITG Saquian kung Election Related Incident (ERI) ang pagpatay sa elected barangay chairman ug wala pa gyud silay matumbok nga motibo sa murder case.

RadyoMaN Ivy Parido