Davao de Oro – Patay ang usa ka Barangay Tanod samtang usa ang kritikal human gipamusil ug gitigbas alas 5:45 sa hapon sa Purok 11, Sitio Canubi, Brgy. San Miguel, Compostela, Davao de Oro sa nakalabay’ng adlaw.
Ang namatay mao si Rodolfo Poliquit, 61 anyos, Barangay Tanod, samtang kritikal ang iyang igsoon nga si Vidal Poliquit, 47 anyos, minyo, residente sa nahisgutang lugar.
Giila sa Compostela Municipal Police Station ang suspek mao si Lando Calolo, 30 anyos, residente usab sa maong dapit.
Sumala sa report sa kapulisan, nakadawat sila og tawag gikan sa mga residente ug daling miresponde ug didto nakit-an na lang si Rodolfo nga dunay mga pinusilan sa wala masayring armas ug mga tinigbasan hinungdan sa iyang kamatayon, samtang angol usab si Vidal tungod sa mga pinusilan ug samad tinigbasan.
Nasikop si Calolo (suspek) sa gihimong manhunt operation ug migawas sa inbestigasyon nga personal grudges ang motibo sa krimen.
RadyoMaN Jules Catisay
