Davao City – Kapin usa ka libo ka pamilya ang nahimong apektado sa baha ug landslide human mibunok ang ulan bunga sa tail end of the cold front hinungdan sa pagbakwit sa mga apektadong pamilya sa probinsya sa Compostela Valley.
Ang duha nga namatay sa landslide giila nga sila Rommel Gogo, hamtong ang pangedaron, residente sa Brgy. Tapia lungsod sa Montevista, ug si Dennis Pesdilla, hamtong ang pangedaron, taga-Prk. 24 Brgy. Ngan sa lungsod sa Compostela, samtang missing si Krisel Hermosora, 12 anyos, residente sa Prk. 5 Sitio Handuromog Brgy. Bayabas lungsod sa Nabunturan, diin nagto-o ang pamilya sa missing nga naanod sa baha ug padayon nga gipagita sa iyang kabanay ug mga sakop sa Municipal Disaster Risk Reduction (MDRRMC) sa lungsod sa Nabunturan.
Miabot sa 16 ka pamilya gikan sa lungsod sa Mawab ang naapektuhan sa baha, 458 ka pamilya gikan sa lungsod sa Monkayo, 174 ka pamilya sa Laak, 209 ka pamilya sa lungsod sa Nabunturan, 163 ka pamilya sa lungsod sa Montevista, 178 ka pamilya sa lungsod sa Compostela, ug 6 ka pamilya gikan sa lungsod sa New Bataan.
Ang mga apektadong pamilya temporaryong nanimuyo sa mga evacuation centers sa ilang tagsa-tagsa ka mga lungsod.
Gani daling naglusad og relief operation ang mga sakop sa Provincial Disaster Risk Reduction Management Council (PDRRMC)-Comval ngadto sa mga apektadong pamilya.
RadyoMaN Juls Catisay
