Davao City – Mi-overflow nga Matiao River sa Compostela Valley province ang giingong hinungdan sa nasinatiang dakong baha sa Pantukan, Comval karong adlawa, August 13, 2019 diin anaa sa 567 ka mga pamilya ang apektado.
Sa pakighinabi sa DXDC RMN Davao kay Police Major Jerry Cavag, Chief of Police sa Pantukan Municipal Police Station, giingon niini nga nakasinati og kusog nga pagbundak sa ulan ang lugar kaganinang kadlawun nga maoy hinungdan sa pag-over flow sa Matiao river.
“Mi-over flow siya (Matiao river) ug deretso sa Poblacion. Hinuon walay casualties apan adunay nakuryentehan apan dali natambalan, minor injury ra,” segun sa COP.
Matud pa nga temporaryong gihikling ang mga pamilya sa Pantukan Municipal Gym ug gitunolan na usab og hinabang sa lokal nga gobyerno.
Dugang sa impormasyon nga dakong naapektuhan ang Kingking, Poblacion, Pantukan diin sa karon kanselado ang mga klase sa nahisgutang lugar.
Sa karon, mihubas na ang tubig-baha ug maagian na usab ang kadalanan nga gibahaan apan ang mga apektadong residente wala pay abiso nga pabalikon na sa ilang tagsa-tagsa ka mga panimalay.
RadyoMaN Renz Barbarona
