Davao City – Paglubag sa li-og ang gikamatay sa usa ka dalagita kinsa nakita na lamang nga wala na’y kinabuhi sa lungsod sa Montevista Compostela Valley Province.
Kini ang gikumpirmar sa inahan nga si alyas Maria nga nabali na ang liog sa iyang anak nga si alyas Grace, 15 anyos rason sa hinanaling kamatayon niini.
Gawas niini, aduna sa’y duha ka samad sa agtang ang biktima kinsa patay na nakita sa Barangay Banglasan sa mao nga lungsod.
Segun sa inahan, mipauli og una ang biktima sa balay sa iyang uyoan kung asa nag-istar ang dalagita ug ang iyang mga igsoon kagabii.
Gumikan ani, adunay pagduda ang ginang nga ang kriminal ug mipatay sa iyang anak ang bana ra pod sa iyang manghod.
Gisaysay pa ni Maria kinsa dinhi sa dakbayan nanarbaho nga dili musugot ang iyang bayaw nga dinhi na sa siyudad sa Dabaw patunghaon ang biktima.
Ug karong adlawa na unta kuhaon sa inahan ang dalagita gikan sa poder sa uyuan kinsa usa na ka bulan wala ulia sa asawa.
Nasayran nga pirmi mahungawan sa kasuko sa uyuan ang biktima panahon mag-away sila sa iyang asawa nga manghod ra pod ni Maria ug inahan sa dalagita.
Buot sab sa inahan nga ma-otopsiya ang patay’ng lawas sa iyang anak aron masayran kun nahilabtan ba o wala ang pagkababaye sa dalagita.
Ug tungod ani, gitinguha sa Ginang nga ma-imbestigahan apil ang iyang bayaw aron masuta kun aduna ba’y kalabotan ang uyuan sa kamatayon sa dalagita.
RadyoMaN Joel Viray
