Davao City – Gidepensahan karon sa Davao City Health Office (CHO) ang pag-instalar og condoms dispensing machine nga maghatag og access sa mga kalalakin-an nga mahiligon sa pakighilawas partikular sa mga kabatan-on.
Buot sa CHO nga matabangan ang mga kalalakin-an hilabi na ang mga batan-on kansang maglisod pagpalit og condom sa mga tindahan tungod sa kaulaw nga bation.
Ug mao kini ang pinaka-ugat ngano taas ang kasong HIV AIDS ug early pregnancy sa dakbayan kun asa natala ang pinakabata nga biktima sa edad nga 12 anyos.
Ang nakitang hinanali nga solusyon mao lang ang paghatag og libre nga condom busa nahimugso ang plano sa pag-instalar og Condom Dispensing Machine sa comfort room sa Sangguniang Panglungsod (SP) building.
Sumala ni CHO Population Division Chief Jeff Fuentes nga 30 porsento sa populasyon sa kabatan-onan sa siyudad may kasinatian na sa sex diin 85 porsiento kanila wala mugamit og condom isip proteksyon.
Nasayran nga sagad sa mga sayo naburos pulos mga estudyante ug dyutay sa mga wala na nagtungha butang nga nakapaalarma og maayo sa CHO.
Dungan sa paghatag sa condom ang pagpa-ilawom sa counseling sa mga batan-on sanglit dili naman matud pa mapugngan ang mga bag-ong tubo karon diha sa sayo nga pakighilawas, dugang pagpasabot ni Fuentes.
Malaumon ang opisyal nga kun dili man matuldukan ang problema makunhuran ang kaso sa HIV AIDS ug early pregnancy sa dakbayan panahon mamuntar na ang Condom Dispensing Machine sa SP building.
RadyoMaN Joel Viray
