Davao City – Naghulat na lamang og budget ang City Health Office (CHO) ngadto sa usa ka pribadong kompanya aron mapatuman ang Condom Dispensing Machine Program dinhi sa dakbayan sa Davao.
Sumala ni City Population Chief Jeff Fuentes, plano nila nga mag pilot testing sa duha ka mga male comfort rooms sa Sangguniang Panglungsod (SP) building diin adunay duha ka mga libreng condoms ang mamahimong ma-avail sa matag lalaki.
Dugang ni Fuentes nga kung positibo ang resulta sa maong pilot testing susama sa ubang nasud, iduso nila kini sa lokal nga konseho aron mabuhatan og ordinansa.
Sa record sa Department of Health 11 (DOH-XI), anaa sa kapin 15, 300 ang nabuntis sa tuig 2016 ug misaka sa kapin 16, 200 sa tuig 2017 nga nag-edad sa 15 hangtod 19 anyos.
Samtang sa first quarter record sa Davao City, gawas sa 36, 843 nga populasyon anaa sa 4, 733 kun 12.8% ang nabuntis mahitungod sa kakulangon sa kaalam ingon man tukmang impormasyon.
RadyoMaN Jason Amisola
