Ginkonpirmar ni Iloilo Police Provincial Office Director Police Supt. Marlon Tayaba nga magapadulong sila sa Metro Manila sa masunod nga semana para magtambong sang Congressional Inquiry nga ginpatawag ni Pangasinan, 2nd District Congressman Leopoldo Bataoil.
Suno sa kay Supt. Tayaba ginpatawag sila ni PO3 Federico Macaya Jr. para maghatag sang ila bahin may kaangut sa natabo nga insedinte sadtung Disyembre 26 sang kaagahon matapos ang gin-alegar nga pagtampa, pagsipa, pagsiko, pagdupla, pagtaya kag ginpalukpan sang armas luthang ni 1st district Congressman Richard Garin Jr. sa atubang sang presensiya ni Guimbal Mayor Oscar Garin Sr.
Maga-upod man sa nasambit nga hearing si Police Regional Office 6 Director Chief Supt. John Bulalacao nga pagatambungan man sang mga opisyal halin sa Camp Crame nga gin-imbitar man suno kay Tayaba.
Magasugod ang hearing alas- dos sa hapon sa lunes sa diin natalana nga magapatigayun sang privilege speech si Congressman Leopoldo Bataoil.
Si Cong. Bataoil ang nangin Provincial Director sang Negros Occidental sang 1990s kag nangin Regional Chief sang Operations and Plans Division sang PRO 6.
