Ginproklamar na kaina sang hapon sang Provincial Board of Canvassers si Iloilo 3rd District Congressman Arthur ‘Toto’ Defensor Jr. bilang nagdaug nga Gobernador sang probinsya sang Iloilo.
Nahibaluan nga naglab-ot sa 87,678 ang nangin abanse ni Congressman Defensor sa final and official result batuk kay Congressman Ferj Biron.
Liwat naman nga nagpasalamat si Defensor sa ginhatag nga pagsalig sa iya sang mga pumuluyo sang probinsya sang Iloilo.
Angut sini, ginpat-od man ni Defensor nga iya igabalik sa pumuluyo ang husto kag tampad nga serbisyo.
Samtang, ginpahayag ni Defensor nga sa karon wala pa siya sang plano nga ilisan ang mga tawo nga naga-uyat sang nagkalain-lain nga posisyon sa provincial capitol kag suno sa iya, kontento siya sa anuman nga maabtan niya sa kapitolyo apang magahimo man siya sang mga adjustment kon kinahanglanon.
