Ya questiona el consejal Rudy Lim con el uno del mga cheque del mga sponsors del pasao Zamboanga Hermosa festival donde ya esta escribido el nombre del un empleyado del city hall y hinde del govierno local.
Na su privilege speech enantes aga na consejo local, nuay nombra si Lim con el tal persona, sin embargo, ya esta asegun dudable el motive del tal empleyado, porque ya pone na su nombre el un major sponsor con el pago na sponsorship del Zamboanga Hermosa festival, que cumbiene era guinda na bolsilyo del govierno local.
Mientras ta aprecia si Lim con el progresivo conducta del festival, ta esta questionable tambien asegun el mensyonao transaksyon.
Porcausa de este, ya propone si Lim para hace llamada por el un dialogo con el ofisina del tresurero, administrador y mga organizers del Hermosa Festival para sumite el report na consejo aserca el gastos y income que ya obtene, lo mismo el disposisyon del mga sponsorships del mga privado companiya que ya expresa suporta pormedio del dalida del dinero como pago na govierno local para el aclaramiento del publico, lo mismo manda esplica co nel tal empleyaod si porque su nombre el escribido na cheque que alegaomente staba na uno del mga sponsors.* – Bhong Simbajon/RMN News*
