Pagadian City, Zamboanga del Sur – Patay ang usa ka construction worker human kini gipusil sa makadaghang higayon alas 10:27 kaniadtong nakalabayng gabie.
Nahitabo ang pagpamusil didtong dapita sa Purok Sweet honey, Barangay Sta. Maria, ning syudad sa Pagadian.
Ang biktima nailang si Caloy Miano, 33 anyos, usa ka construction worker, ug residente sa Purok Lansones, Tuburan, Pagadian City.
Sa imbestigasyon nasayran nga alas 10:24 sa gabie, duha ka sunud-sunod nga buto sa pusil ang nadunggan sa mga lumulupyo sa maong dapit ug mao na lamang ilang nakit-an sa dalan ang nagbad-ay nga lawas sa biktima ug wala nay kinabuhi. Puno kini sa mga samad pinusilan kinsa matud pa gipusil sa wala mailhang mga suspetsado.
Daling gisusi sa mga mirespondeng personahe sa Provincial Crime Laboratory Office/ SOCO ang dapit nahitabuan.
Narekober sa maong dapit ang 2 ka basiyo sa bala ug duha mga buhing bala sa calibre 45 nga pistola.
Ang patayng lawas sa biktima ang gihaya na karon sa Gamalinda Funeral Homes nga nahimutang sa National Highway Barangay Tiguma, samtang padayun ang gihimong makuting imbestigasyon sa kapulisan dinhi sa syudad arun sa pag-ila ug pagsikop sa mga suspetsado nga maoy responsable sa naasoyng pagpamusil.
