General Santos City—patay nang nakaplagan sa iyang mga kaubanan ang usa ka Construction worker human gituohang giurom didto mismo sa ilang gitrabahuan sa may Block 2, Golden Plains, barangay Cahilsot, Gensan.
Ang biktima nailhang si Paulino Siason, 37, residenti sa Prk. Pandian ning syudad.
Subay sa inisyalnga imbistigasyon sa kapulisan gikan mismo sa mga kaubanan sa biktima nga alas 7:00 ang takna sa nakalabayng adlaw dihang milakaw ang nahisgutang biktima. Miuli kini ug alas 3:00 ang takna apan hubog.
Natulog kini tapad ang iyang duha ka kauban sa trabaho, pila ka oras ang nakalabay, ilang namatikdan nga grabe ang hagok sa biktima, ilang gitan-aw apan wala man silay nakit-ang timailhan nga kini giurom hinungdan nga ila nalang gipasagdan.
Pila ka oras ang nakalabay, sila natingala nalang nga wala na naglihok ang biktima hinungdan ilang gipukaw apan bugnaw na ang lawas niini ug wala nay kinabuhi.
Gilayon mireport ang mga kaubanan niini sa Tambler Police Station ug dihang giimbistigahan wala may nakit-an foul play ug gituohang giurom ang maong biktima.
Sa karon ang patayng lawas niini, anaa na sa lokal nga punerarya dinhi sa syudad.
