Ya nega el Bendimil Construction Corporation cay atrasao sila na implementasyon del proyekto de pipelaying na Z3R aqui na ciudad de Zamboanga.
Ya aparece na consejo local enantes aga el mismo presidente del mensyonao construction firm Engr. Edmund Dimaano,ablando cay on target y on schedule el implementasyon del diila trabajo dentro na mga workable areas que donde ta pasa el pipelaying project para na mga caseriyas que ya construji bajo na Z3R project.
Si Dimaano ya abla cay si chene man problema, este hinde ta esta canila sin embargo, na National Housing Authority (NHA) y na Department of Public Works and Highways (DPWH) quien amo el encargao na todol mga proyekto bajo na Z3r.
Ta implemental ang asegun el contractor con el cosa stipulao na diila contrata que ya gana durante el bidding del govierno, y si chene man algun suspension y mga problema que ta emfrenta amediante el implementasyon del tal proyekto, hinde mas este na diila poder, sin embargo, na disposisyon na del NHA y DPWH.
Asegun con Dimaano, si nuay tanto problema, pwede hace acaba el su mga trabajador con el complesyon del tal proyekto na fin de este año.
El Bendimil ta apela con el govierno local y losdemas pa mga ahensya concierne para esta unido y hace de pronto el mga proceso para nuay cosa problema emfrenta el tal proyekto na implementasyon de este na Z3R area*. – Bhong Simbajon/RMN News*
