Davao City – Kampante karon ang kanhi pangulo sa Davao City Chamber of Commerce and Industry Incorporated (DCCCI) nga lig-on ug luwas ang mga building sa dakbayan bisan pa og muigo ang makusog nga linog kay walay paltos nga ginasunod sa mga negosyante ang mga specifications sa mga materyales nga giingon sa National Building Code of the Philippines ug sa Building Permit sa mga gambalay nga gitukod dinhi sa syudad karon.
Matud ni kanhi DCCCII President Tony Dela Cruz, matinud-anon nga gituman sa mga magpapatigayon ang National Building Code of the Philippines ingon man ang lagda sa Building Permit diha sa pagtukod og mga gambalay sama sa condo, hotel, malls ug uban pa, busa lauman sa katawhan nga luwas ang mga building sa dakbayan itandi sa miaging mga katuigan.
Nagtamod gayud sa kamanduan ni Mayor Sara Duterte-Carpio ang mga negosyante diha sa pagtuman sa standards sa paggamit og mga materyales alang sa mga gambalay nga itukod diin bisan ang makusog nga linog dili gayud makapaliki ug makapahugno sa mga building.
Gani, kamatooran niini, gisuportahan sa mga negosyante ang rekomendasyon nga ipailawom sa thorough review ug bag-uhon ang obsolete na kaayo nga National Building Code of the Philippines gumikan dili na kini haom sa presenteng panahon nunot sa pag-otro sa panahon ug sa dagan sa kinaiyahan sa kalibutan karon.
Wala diha sa mga negosyante ang problema kung nganong adunay mga gambalay nga substandard pagkahimo, inay iya kini sa mga contractor sanglit adunay mga engineers nagahuna-huna og dakung ginansiya maong ilang baratohon ang mga materyales nga pagagamiton sa mga gambalay nga ilang tukoron.
Dili sayop kun sala sa City Engineers Office ug sa City Building Office ang kapalpakan sa mga contractor sa katarongan nga igo lamang sila naghunahuna nga maka-ginansiya og daku-daku ang mga project engineers mao nga ilang baratohon ang mga materyales nga ilang gamiton sa pagtukod og mga building, resulta sa pagkahugmak unya niini.
Panawagan ni Dela Cruz ngadto sa iyang mga kakaubanang negosyante nga sundon ang mayor nga magpatuman og temporaryong pagsirado ug ihiklin ang tanang mga nag-okupar sa mga establisimiyento nga nakitaan og dunay dagkong mga liki ug gideklarang dili na luwas pang puy-an sa mga tawo.
RadyoMan Joel Viray
