Davao City- Gipatawag sa konseho ang mga contractors diha sa proyekto sa Shrine Hills ning syudad sa Dabaw, Regional Director sa Department of Public Works and Highways kun DPWH XI lakip na ang City Engineer’s Office kun CEO sa regular session sa Davao City Council karong adlawa.
Kini ang gisulti ni Davao City Councilor ug Committee of Transportation chair Conrado Baluran atol sa interview sa DXDC RMN Davao diin giimbitihan sila aron tubagon ang mga pangutana subay sa problema karon sa may Diversion Road, Maa ning dakbayan nga matud pa nasobrahan ang pagkalot sa yuta.
Sumala ni Baluran, manubag ang DPWH, contractors ug Mines and Geosciences Bureau (MGB) tungod subay sa ordinansa nga 2013 revised Davao City Comprehensive Land Use Plan (CLUP) ug Zoning Ordinance, nag-identify nga ang nasangpit nga area usa ka landslide prone area apan gihilabtan gihapon kini.
Dugang ni Baluran, dili sa ingon nga ginababagan ang mga proyekto alang sa kalamboan sa syudad apan kinahanglan lang manubag og kinsa ang responsable sa problema karon sa Shrine Hills diin labing naapektuhan ang mga residente duol sa lugar, mga motorista mga pasahero, gani grabe usab ang economic loss sa mga byahedor tungod dili na maapas ang mga produkto nga kinahanglang ibyahe tungod sa bug-at nga trapiko dala sa pagsirado sa Diversion Road.
Laumang mutambong ang mga nasangpit nga naimbitahan aron tukion og unsay solusyon sa problema nga ginaatubang karon sa syudad sa Dabaw.
“Wala man tay babag o tutol sa mga improvement sa syudad, malipayon gani ta ug bulahan ta karon, we don’t want to become part of the problems, but we want to become part of the solutions kay public service atong tuyo kaso ang problema nganong ila ning gibuhat, nasobraan sila og kalot ug kuha og yuta kilid sa Shrine Hills, manubag gyud ang contractors ani ba,” sigun ni Baluran.
RadyoMan Renz Barbarona
