Davao City – Patay human nakigpinusilay atol sa gikasang joint buy-bust operation sa Philippine Drug Enforcement Agency XI ug National Bureau of Investigation XI ang pugante sa Davao Prison and Penal Farm nga si Rogelio Capistrano III alyas Jay-ar Biyernes ala-1:10 sa hapon sa Jade Valley Subdivision, Tigatto ning syudad.
Sa interbyu sa RMN Davao gibutyag ni PDEA XI Assistant Regional Director Behn Tesiorna nga ang mismong suspek pa ang nagbuot kung asa makigtagbo sa ilahang agent bugti sa P15,000 kantidad sa shabu.
Matud ni Tesiorna nga sa dihang nasimhutan sa maong suspek nga operasyon kini sa mga awtoridad nagpabuto kini’g kaduha gamit ang iyahang .38 nga revolver hinungdan nga nibalos na ang mga operatiba.
“Notorious man gud ni daghan na nag-report sa amoa nga involved na ni sa patay ug sa droga. Among ginadudahan nga ang iyahang item ani dili lang shabu apan ecstasy usab kay gatambay-tambay ni siya sa bars kapila na ni namo ginamonitor pero abtik kaayo. Kini nga surveillance namo nidagan pa ni’g pila ka bulan una namo siya nakuha,” sumala ni Tesiorna.
Gideklara ang suspek nga patay sa Southern Philippines Medical Center.
Narekober sa mga awtoridad ang usa ka gramos sa shabu, mga bala, baril niiini ug mga pekeng IDs.
Gibutyag ni Tesiorna nga kumbiktado kini sa 3 counts sa kasong murder.
“Kini siya ang nahibaw-an pa lang nato nga nagkaso wala pa ta kahibalo sa mga gipangpatay niya nga wala nagkaso ug sa iyahang gipangpatay katong nipuga na siya kay kumpirmado hired gunman, assassin ni siya, kasagaran operation ani niya sa Davao del Norte,” segun ni Tesiorna.
Samtang, gibutyag ni NBI XI Assistant Regional Director Jonathan Balite nga nakaikyas kini niadtong Marso 2017.
“Sentenced siya last 2014 sa kasong murder,” matud niini.
RadyoMaN Aimee Guinita
