Davao City – Gipasakaan na og kasong robbery extortion ang duha ka mga sakop sa City Transport and Traffic Management Office kun CTTMO nga sila Eric Villanueva ug Leodegario Zagado kinsa nasikop tungod sa giingong pagpangilkil.
Sa interbyu sa RMN Davao kang CTTMO head Dionisio Abude nga dili kini niya i-tolerate ang mga iligal nga binuhatan sa iyahang mga ginsakpan.
“Termination gyod ni awtomatik dili gyod pwedi nga naa pay personahe nga ingon ana diha sa atong opisina,” matud ni Abude.
Pahugtan ni Abude ang internal cleansing ug pagmonitor sa uban pang mga traffic enforcers.
“The same ang ilahang abuton kung inkaso’g adunay mga reklamo ug kung madakpan sila priso tapos i-terminate,” segun niini.
Niadtong Lunes nabitik ang duha atol sa gikasang entrapment operation sa IDMB sa may Quimpo Boulevard ning syudad.
Base sa report sa IDMB nga alas-11:45 sa buntag gi-flagged down ni Villanueva ang unmarked van nga gisakyan sa mga operatiba tungod sa giingong overspeeding gamit ang iyahang speed gun.
Atol matud pa sa maong operasyon giingong nangilkil kini og P500.00 aron ma-areglo ang maong violation.
Human nga madawat ni Villanueva ang bayad iyaha kinining gitunol ang kwarta ngadto kang Zagado.
“Karon kay nahitabo man gyod nga awtoridad ang ilahang gipara unya gidawat nila ang kwarta, so prima facie evidence kana, caught on the act gyod sila sa ilahang gihimo,”
“Sayang ang ilahang pipila ka tuig nga pagtrabaho. Si Villanueva is 18 years naman to nag-trabaho unya 20 years katong si Zagado. Sa pipila ka pagpamilok nadaot tanan tungod sa ilahang binuhatan ug nadamay pa gyod ang atong opisina,” matud ni Abude.
Segun ni Abude nga nagpabilin gihapong taas ang moral sa CTTMO.
“Gi-encourage gihapon nako akong mga tao nga mag-trabaho lang ta katong mga nagtinarong padayunon nato,” matud ni Abude.
Abli ang CTTMO nga mudawat og mga lehitimong reklamo diha sa giingong corrupt enforcers sa kadalanan.
“Gihangyo pod nako ang mga mureklamo nga kung pwedi lang kanang legitimate nga complaint kanang gidakop mo, gipugos mo nga pangayuan og kwarta. Kay naa may uban nga ginaimbestigahan nato kay tungod nasuko kay nadakpan butang-butangan nila ang atong enforcers,” matud ni Abude.
RadyoMaN Aimee Guinita
