TACLOBAN CITY – Dumaop ha RMN Tacloban hi Joseph Tangili, an Presidente han Motor Cab for Hire (MCH) dinhi ha Tacloban para igpakiana kun magpapatuman na ba hira hin PHP9.00 nga pasahe.
“Nagpakiana ha akon an mga parag motor kun hain na an increase kay ngatanan nag increase na, kami nala it nabebehind.”
Ha pagkawurok hini nga ira sitwasyon, iya ginpakianhan hi Tacloban City Councilor Jerry Uy kun pwede na ba hira manukot hin PHP9.00, an baton ni Uy in pwede na hira manukot kay pasado na an ordinansa dida pa han October 2018 ngan na-implemantar ini dida han December 16, 2018.
Sanglit dida han myerkules, January 30, 2019, iya gin-anunsyo ha mga igkasi MCH drivers han Tacloban nga pwede na hira manukot hin tag PHP9.00 nga pasahe ha mga pasahero.
Kumontra naman dinhi an tagapagkayan han Tacloban City Government nga hi Malou Tabao, sumala ha iya, ira ginpapatamakan an Section 5 prohibited acts han Ordinance No. 2018-13-32 nga nagsisiring nga “non-posting of the corresponding fare matrix sticker which shall be posted on the inner side of the sidecar immediately fronting the passenger seat.”
“It prohibited acts an karuyag sidngon kun ano an diri pa pwede, nakabutang dida nga kun waray pa fare matrix nga nakapost diri pa pwede magsukot.”
“Kay waray pa man makaprint an licensing office, within this week magawas na an fare matrix by that time pwede na kita makapanukot.” – Malou Tabao
Sumala naman kan Councilor Uy, waray magsiring an ordinansa nga nakadepende an implementasyon kun mayada na fare matrix sticker.
“Kun babasahon naton an ordinansa, waray dida nasiring nga dependent ito hiton publication of the fare matrix. An effectivity hiton usa han ngatanan nga mga balaud is 15 days after han iya publication.”
“Kun ini nga failure hit pag publish hiton nga fare matrix kanan executive department, kun diri pa hira nakapagpagawas hiton fare matrix diri karuyag sidngon nga diri hira pwede manukot na kay ada man it balaud klaro man nga nasiring 15 days after publication.”
Nagdidig-on naman an executive department han City Government nga diri pa pwede magpatuman an mga MCH drivers hin PHP9.00 nga pasahe, unless mayada na hira fare matrix sticker.
Sumala kan Tabao, an pwede la tagan hin fare matrix sticker an mga MCH drivers nga nagpa-renew han ira business permit.
Samtang, ha masunod nga session ha Sangguniang Panlunsod han Tacloban, karuyag klaruhon ni Councilor Uy ha bug-os nga konseho an nasabi nga ordinansa.
