Davao City – Lamas na sa kaminyoon sa magtiayon ang dili pagsinabtanay ug pagbinugnuay diin usahay musangko sa duguon nga panghitabo dala na usab sa lahi-lahi nilang personalidad.
Ug kini nga insidente dili na bag-o pa sanglit sukad pa kaniadto aduna namay mga panghitabo nga kung asa napatay sa bana o sa asawa ang kapikas sa kinabuhi tungod lang sa bikil.
Base sa pagtuon pipila sa mga tinubdan sa away sa magtiayon mao ang salapi, selos, pag-atiman sa mga anak, ug daghan pang uban.
Apan si Gheena Agtas kinsa registered counselor ug magtutudlo nagpunting sa selos isip pinaka-common nga hinungdan sa giyera sa mag-asawa.
Kung selos na gani ang mag-andar lisod mapugngan ang pagbati nga kung kis-a muabot sa punto nga bisan unsa na lang i-yawyaw hangtud magsinakitay na sa matag-usa.
Ehemplo ani ang nahitabo sa Negros diin usa ka ofw ang gipatay sa kapuyo nga lalake gumikan sa labihang selos gibati nunot sa istorya nga lagi dunay laing binuhat ang biktima.
Busa nakita ni Agtas ang kamahinungdan sa counseling kay mao lang kini ang venue aron makapagawas sa gibati ang asawa o bana nga walay ni usa kanila makabsan sa kinabuhi.
RadyoMaN Joel Viray
