Sumala ni Davao City Mayor Sara Duterte-Carpio atol sa livestream interview sa iyang official Facebook page, kinahanglang paspasan ang pag-abli sa mga opisina, establisyemento ug mga negosyo sa syudad ilabina nga makaapekto gayud dili lang sa Pilipinas kundi sa tibuok kalibutan ang nahitabo karong giyera sa Russia ug Ukraine.
“We need to move fast on reopening our city and our economy tungod kay kaning giyera diha sa Russia ug sa Ukraine duna ‘ni syay epekto diri sa atoa especially in terms sa prices sa basic commodities, prices sa gasolina,” sulti sa alkalde.
Gipasabot ni Mayor Sara, luyo sa pagpaluag sa COVID-19 restrictions, kinahanglan gihapon ang padayong pagsunod sa minimum public health standards batok COVID-19 ilabina ang pagsuot sa face mask ug social distancing.
Sa laing bahin, gimandoan karon ni Duterte-Carpio ang mga Overseas Filipino Workers (OFWs) sa Ukraine nga makigkoordinar sa Department of Foreign Affairs (DFA) aron luwas nga maka-evacuate sa nagapadayong giyera, diin ginasuta pa usab karon kung adunay Davaoeños nga apektado karon sa tensyon sa maong nasud.
RadyoMaN Kirby Manzon
