Davao City – Usa sa pinakaepektibo nga pamaagi sa pag kontrola nga mukuyanap ang Coronavirus Disease kun COVID-19 mao ang paglikay sa panagtapok.
Kini ang gisugilon ni Department of the Interior and Local Government kun DILG-XI Regional Director Alex Roldan busa siya makaingon nga makatabang karon ang pagpatuman sa quarantine pass aron makontrola ang paggawas sa mga tao.
Apan usa sa mga gikabalak-an sa katawhan karon sa paghatag og home pass mao ang pamulitika busa segun ni Roldan nga padayon nga mag-monitor niini ang DILG sa pagpatuman sa home quarantine diin matud sa regional director nga wala man hinuon silay na-monitor nga mga opisyales dinhi sa syudad nga gihimo’g negosyo ang maong pass gawas lamang sa kaulohan nga duna nay mga Brgy. Officials nga ilang napasakaan og kaso gumikan sa pagpamaligya og quarantine pass.
“So usa sa mga solusyon nila mao ang mga lockdown ug mga barangay kadtong kada balay, naa lay tugotan nga mao lay mugawas aron ma-control ug dali ma-trace og dunay contamination… Diri sa atoa I don’t know kung musulay sila diha og binuang kang mayor Inday kay Mayor inday is really very serious on this concern,” segun ni Roldan.
Samtang gipahinumdoman karon ni DILG Secretary Eduardo Año ang publiko atol sa usa ka conference nga kanunay matud pa ‘one step ahead’ ang gobyerno sa Pilipinas sama sa Spain ug Italy bisan sa US sa hugot nga pagpatuman sa mga precautionary measures nga gitawag pa niining ‘draconian measures’ sama sa lockdown apan padayon nga nanghinaut ang maong buhatan nga musunod ang katawhan sa kanunay nga pahimangno sa gobyerno aron di na musaka pa ang ihap sa kaso sa COVID-19 sa Pilipinas.
RadyoMaN Renz Barbarona
