Davao City – Nangpahimangno si Davao City Mayor Sara Duterte-Carpio sa publiko nga dili gihapon mokumpyansa tungod kay posible gihapon nga magbaton og surge sa Coronavirus Disease 2019 (COVID-19) cases bisan pa man og makab-ot ang herd immunity.
Matud ni Mayor Sara (sa interbyu sa city-owned radio), base sa public health experts ang posibleng COVID-19 surge maoy resulta sa Christmas, New Year o holiday gatherings nga risgo sa COVID-19 transmission, gawas pa sa nanggawas nga bag-ong COVID-19 variant.
“Nangutana ko sa atong health group sa Response Cluster (kung) duna ba gyoy (COVID-19) surge nga mahitabo sunod tuig, and the answer was yes. Ang dili lang nato masulti is kung unsa kadako or unsa ka deadly,” sulti sa alkalde.
Gipasabot sa mayor, bisan og makab-ot ang herd immunity batok COVID-19, posible gihapong magbaton og takod sa virus apan dili na mamahimong severe o critical ang tawo kung siya bakunado na.
Panawagan ni Duterte-Carpio sa publiko aron nga dili mamahimong grabe sa ang surge, kinahanglan lamang nga padayong sundon ang minimum public health standards batok COVID-19 partikular na ang pagsuot og face mask, social distancing ug ang pagpabakuna.
RadyoMaN Kirby Manzon
