Davao City – Gilauman sumala pa karon sa mga health experts dinhi sa syudad sa Davao nga mutaas pa ang kaso sa Coronavirus Disease 2019 (COVID-19) sa sunod bulan, Hunyo.
Gibutyag ni Davao City Mayor Sara Duterte-Carpio nga kini ang gilauman sa mga doktor diin ang pagpailawom sa syudad sa General Community Quarantine (GCQ) ang nag-unang rason nganong nagkataas ang kaso sa Coronavirus Disease 2019 (COVID-19) sa dakbayan.
“Ang expectation sa doctor, ang acceleration, ang surge will be next week and second week of June. So mao na iyahang expectation nga mudaghan gyud na og samot because of GCQ,” butyag sa alkalde.
Gidugang sa mayor nga mitaas ang kaso gumikan kay daghan na usab ang gina-swab test karon ug pagpahigayon og case finding, health screening ug rapid diagnostic test (RDT).
Una nang gibutyag sa alkalde nga kung siya ang pabut-on mamahimong i-GCQ gihapon o Modified General Community Quarantine (MGCQ) ang syudad sa Davao human ang Mayo 31 apan nagdepende gihapon kini sa ihap sa kaso ayha ang maong panahon.
RadyoMaN Kirby Manzon
