Davao City – Plano karon sa City Government of Davao nga dal-on sa barangay level ang pagbakuna sa mga tawo batok Coronavirus Disease 2019 (COVID-19).
Matud ni Dr. Michelle Schlosser, Spokesperson sa Davao City COVID-19 Task Force (sa interbyu sa city-owned radio) nga kini usa ka epektibong pamaagi nga ginahimo na karon sa mga konsehal sa syudad aron nga makab-ot ang target nga 15,000 ka tawo nga ma-vaccinate matag adlaw.
Sulti ni Schlosser nga halos nabakunahan na ang mga sectoral groups ug mga indibidwal nga nahilakip sa vaccination priority list apan aduna pa gihapoy nga wala nabakunahan sulod sa mga barangay.
Dugang sa health official nga gawas sa vaccination, dal-on usab sa maong barangay level ang information campaign niadtong nagdumili o nagduha-duha pa nga magpabakuna.
“Isa sa mga nakita gyud is kadtong ways sa (Davao City) councilors nga naga-go sila down to the barangay level. So, we are eyeing that (nga) dal-on ang vaccination rollout mga sa tagsa-tagsa ka barangay,” matud ni Schlosser.
Nasayran nga pipila sa mga pamaagi sa pagpapaspas sa vaccination rollout sa lokal nga gobyerno mao ang pagpahigayon og mobile vaccination, ‘Bakuna Nights’ ug uban pa.
RadyoMaN Kirby Manzon
