Davao City – Kinahanglan nga magbaton og saktong guidelines ugaling ablihan na pag-usab ang Roxas Night Market dinhi sa Davao City human sa sugyot nga reopening tungod sa nagkaubos nga kaso sa Coronavirus Disease 2019 (COVID-19) sa dakbayan.
Gikanayon ni Dr. Michelle Schlosser, Spokesperson sa Davao City COVID-19 Task Force (sa interbyu sa city-owned radio), kinahanglang magpresenta ang City Economic Enterprise og guidelines labi na paunsa mapatuman ang minimum public health standards batok COVID-19.
Gipasabot ni Schlosser nga makonsiderang high-risk sa COVID-19 ang lugar labi na nga ginahubo ang face mask tungod sa pagkaon ug kinahanglang masiguro nga protektado ug dili mabutang sa risgo ang mga vendors ug ang publiko.
“There should be a concrete guideline as to unsaon nato pag-open sa Roxas Public Market na safe siya, not just for the vendors but kadtong mga clients nato didto,” segun ni Schlosser.
Una nang gibutyag ni Davao City Mayor Sara Duterte-Caropio nga ginatun-an na karon sa City Economic Enterprise ang pagbalik operasyon sa Roxas Night Market, apan walay pay petsa kanus-a kini matigayon.
RadyoMaN Kirby Manzon
