Magsugod na sa karong adlawa ang COVID-19 vaccination roll-out sa Bukidnon Provincial Medical Center kon BPMC.
Sa interview sa RMN DXMB Malaybalay ngadto kang Provincial Health Officer Dr. Gary Guido C. Tabios, Jr. gibutyag niini nga naabot na kagahapon sa Bukidnon ang 530 ka mga Sinovac Vaccines.
Matud ni Dr. Tabios nga unang bakunahan ang healthcare workers sa COVID-19 Referral Hospital sa Bukidnon nga mao ang (BPMC).
Nasayran nga laumang mabakunahan karong adlawa ang 530 ka eligible population of frontliners.
Lauman usab nga unang mabakunahan sa Bukidnon si chief of Hospital Dr. Miguel Antonio Prantilla.
Nasayran nga ang illegible population sa frontliners sa BPMC mopaubos sa mosunod nga proseso: 1. Registration – dinhi himoon ang pagsusi sa ilang identification; 2. Counselling – alang sa pagpasabot sa vaccination program; 3. Screening – aron mahibal-an kung wala baý gipamati nga dautan sa lawas pinaagi sa pag-check sa vital signs; 4. Actual vaccination; ug 5. Observation, diin obserbahan ang mabakunahan sulod sa 15 ngadto sa 30 minutos.
Gipasabot usab ni Dr. Tabios nga dili ipaubos sa vaccination program ang mga mabdos, nagplano nga magburos ug kadtong nag-edad ug 60 anyos pataas nga empleyado sa BPMC.
Gidasig karon sa gobyerno ang katawhan nga pahimuslan ang kahigayonan ug mosalig sa kagamhanan ning lakang sa pagpamakuna batok COVID-19 tungod kay miagi kini sa makuting pagtoon sa mga eksperto alang sa kaluwasan sa katawhan.
Mahinumduman nga ang Bukidnon migahin ug ₱300-Million alang sa posebling pagpalit sa bakuna alang sa katawhan sa probinsya.
