Davao City – Pabor ang Chief of Clinic sa Southern Philippines Medical Center (SPMC) sa mandatory COVID-19 patient data disclosure aron mahunong ang maong balatian gikan sa pagkuyanap niini.
Sumala ni Chief of Clinic Dr. Ricardo Audan, ang maong pamaagi magseguro nga dili matakdan ug nga maluwas ang mga frontliners gikan sa balatian hilabi na nga pila na ka mga doktor sa nasud ang namatay tungod ning maong virus.
Gibarugan ni Audan nga gikinahanglan gayod nga masayod ang mga doktor ug nurses sa health background sa ilang pasyente aron malibre ang ilang kinabuhi gikan sa pagka-casualty ning nasangpit nga pandemic.
Hinonoa, mamahimo sa gihapong katugtan ang pagbulgar sa mga COVID-19 apan ngadto lamang sa Department of Health (DOH) ug dili sa kadaghanan kun sa publiko aron sa ingon dili malapas ang privacy sa usaka indibidwal.
Gipabuhagay ni Audan ang iyang katarongan nga sa karon nga nag-atubang og krisis ang nasud, walay igong rason aron dili una ipadaplin ang privacy aron ipasulabi ang kaayohan ug interes sa kadaghanan.
Dugang ni Audan nga mas mapadali ang contact tracing sa mga tawong makahalubilo sa mga nag-positibo sa COVID-19 ug mapaspasan usab ang pagresolba sa maong balatian.
RadyoMaN Joel Viray
